Rannsókn sérstakrar rannsóknarnefndar móðurfélags Elkem Ísland á tildrögum vinnuslyss sem varð hjá járnblendiverksmiðjunni á Grundartanga þann 29. júní sl. er lokið. Fyrr í þessari viku hófst vinna við að endurræsa ofninn sem eldurinn slapp úr. Yfirumsjón og meginþungi rannsóknarinnar hefur hvílt á sérfræðingum frá móðurfélaginu Elkem AS í samstarfi við starfsmenn verksmiðjunnar á Íslandi. Vinnueftirlitið hefur frá upphafi fylgst með framgangi rannsóknarinnar og var ákvörðun um að gangsetja ofninn á nýjan leik tekin í samráði við stofnunina. Niðurstöður í sjálfstæðri rannsókn Vinnueftirlitsins á tilurð slyssins liggja einnig fyrir.

Starfsmaðurinn sem slasaðist alvarlega við vinnu sína í verksmiðjunni þann 29. júní sl. er látinn. Hann hét Óskar Stefánsson og var þrítugur að aldri, fæddur 3. ágúst árið 1979. Óskar lætur eftir sig dóttur sem fædd er árið 1997. Óskar hóf störf hjá Elkem í mars árið 2008 og hafði því starfað hjá félaginu í rúmlega tvö ár. Hann sinnti verkefnum sínum af alúð og kostgæfni og ávann sér á þessum skamma tíma bæði traust og vináttu samstarfsmanna sinna. Óskars er sárt saknað af samstarfsmönnum sínum og er aðstandendum hans vottuð djúp samúð vegna þessa hræðilega slyss.